რატომ დაეცა ბიტკოინი $20 000-ზე დაბლა?
კრიპტოვალუტის ბაზრისთვის მარტი ცუდი თვე გამოდგა და ბიტკოინის ფასი კვლავ $20 000-ზე დაბლა დაეცა. ეს ვარდნა მარკეტმეიკერების მანიპულაციას არ წარმოადგენს და ის არც USDC-ის აშშ-ის დოლარისგან აშვებითაა გამოწვეული, რადგან ეს მოგვიანებით მოხდა. მაშ, რა მოხდა სინამდვილეში?
Silvergate ბანკის ლიკვიდაცია
1 მარტს კრიპტომეგობრულმა Silvergate ბანკმა გამოაცხადა, რომ თავისი 10-K წლიური ანგარიშის წარდგენა გადადო, რის გამოც მისი აქციების ფასი 30%-ზე მეტით დაეცა. ბანკმა თავის შეტყობინებაში განმარტა, რომ წლის დასაწყისში დამატებითი სავალო ფასიანი ქაღალდები გაყიდა და მომდევნო თვეებში შემდგომი ზარალის დაფიქსირებას გეგმავს. მეორე დღის დილით BTC-ის ფასი 23,5 ათასიდან 22,2 ათას დოლარამდე დაეცა.
როგორც თქვენ ალბათ მიხვდებოდით, კვალს ცნობილ FTX ბირჟამდე მივყავართ, რადგან ის Silvergate-ის კლიენტი იყო. ამ სიტუაციის გათვალისწინებით, ინვესტორებმა ბანკიდან 8 მილიარდ დოლარზე მეტი გაიტანეს, რამაც მისი მდგომარეობა გააუარესა.
8 მარტს მიღებულ იქნა გადაწყვეტილება Silvergate-ის ლიკვიდაციის შესახებ და ზოგიერთმა კრიპტობირჟამ შეაჩერა დეპოზიტები USD-ში, რადგან ეს ფუნქცია ამ ბანკის წყალობით იყო ხელმისაწვდომი.
ფედერალური სარეზერვო სისტემა ზეწოლას გააგრძელებს
7 მარტს სიტყვით გამოვიდა აშშ-ის ფედერალური სარეზერვო სისტემის თავმჯდომარე ჯერომ პაუელი, რომელმაც ბაზარზე არსებულ ვითარებაზე კომენტარი გააკეთა და მონეტარული პოლიტიკის სამომავლო კურსზე თავისი ხედვა წარმოადგინა. მან აღნიშნა, რომ ქვეყნის ეკონომიკა თავს კარგად გრძნობს და ინფლაცია არ ეცემა ისე სწრაფად, როგორც სასურველი იყო.
ამიტომ, ჯერომ პაუელი თვლის, რომ რეფინანსირების განაკვეთი შესაძლოა მოსალოდნელზე მეტად გაიზარდოს. ბაზარმა ეს ნეგატიურ ნიშნად მიიჩნია და ბიტკოინის ფასი კიდევ რამდენიმე პროცენტით დაწია, რადგან ფედერალური სარეზერვო სისტემის ქმედებები მიმოქცევაში არსებული ფულის რაოდენობას ამცირებს და, შესაბამისად, სულ უფრო ნაკლებია ადამიანი, ვისაც სურს თავისი დანაზოგის ინვესტირება ისეთი მაღალი რისკის მქონე აქტივებში, როგორიცაა კრიპტოვალუტები.
SEC-ი Kucoin-ისა და ETH-ის წინააღმდეგ
9 მარტს ნიუ-იორკის გენერალურმა პროკურატურამ შეიტანა სასამართლო სარჩელი კრიპტოვალუტის ბირჟა KuCoin-ის წინააღმდეგ და დაადანაშაულა ფასიანი ქაღალდების არარეგისტრირებულ გაყიდვაში, კონკრეტულად კი ტოკენებისა, როგორიცაა ETH, LUNA და TerraUSD.
ეს არის ერთ-ერთი პირველი შემთხვევა, როდესაც მარეგულირებელი სასამართლოში ამტკიცებს, რომ ETH არის ფასიანი ქაღალდი. სარჩელში აღნიშნულია, რომ ბირჟა KuCoin უნდა დარეგისტრირებულიყო შტატში, რათა მიეღო ამ აქტივების გაყიდვის ნებართვა. გარდა ამისა, ფასიან ქაღალდებად დასახელდა პროგრამა Kucoin Earn-იც, რომელიც დაკრედიტებასა და სტეიკინგს ითვალისწინებს.
ამ მოვლენების ფონზე, ბიტკოინმა $21 000-ის ნიშნული გაარღვია და ზემოთ ნახსენები სარჩელი ერთადერთი კატალიზატორი არ არის.
გადასახადი მაინერებისთვის
იმავე დღეს აშშ-ის პრეზიდენტი ჯო ბაიდენი გამოვიდა წინადადებით 2024 წელს ქვეყნის ხაზინა კრიპტოვალუტის მაინერების ხარჯზე გაზრდილიყო. ვარაუდობენ, რომ ელექტროენერგიის ხარჯებს 30%-იანი გადასახადი დაემატება.
აღსანიშნავია, რომ ახლა ბიტკოინის მაინერები ისედაც ვერ დაიკვეხნიან მაღალი შემოსავლებით, ხოლო მათი პერსპექტივები არც თუ ისე დამაიმედებელია. ამის შესახებ მეტი შეგიძლიათ გაიგოთ ჩვენს სხვა სტატიაში ვებგვერდზე.
Silicon Valley Bank-ის კრახი
ბიტკოინის ფასისთვის გადამწყვეტი დარტყმა Silicon Valley Bank-თან დაკავშირებული ვითარება გახდა. 10 მარტს გავრცელდა ინფორმაცია, რომ ბანკი აწარმოებდა მოლაპარაკებებს თავისი გაყიდვის შესახებ მას შემდეგ, რაც კაპიტალის მოზიდვის მცდელობა უშედეგო აღმოჩნდა. ამის გამო Silicon Valley Bank-ის აქციები 60%-ით დაეცა და იმავე დღეს კალიფორნიის ფინანსური დაცვისა და ინოვაციების დეპარტამენტმა მისი დახურვის გადაწყვეტილება მიიღო.
როგორც 11 მარტს გახდა ცნობილი, სწორედ ამ ბანკში ინახებოდა USDC სტეიბლკოინების რეზერვების მნიშვნელოვანი ნაწილი. ამის შესახებ მოგვიანებით ოფიციალურად განაცხადა კომპანიამ Circle, რომელიც USDC-ის ემიტენტია. ამ მოვლენების ფონზე, ზემოხსენებულმა სტეიბლკოინმა დაკარგა აშშ დოლართან ბმა და მომენტში დაახლოებით 15%-ით იაფად ივაჭრებოდა.
ასევე გაირკვა, რომ Silicon Valley Bank-ში სახსრებს ფლობდა ზოგიერთი კრიპტოვალუტური სტარტაპი და ვენჩურული ფონდიც კი, რომლებიც ინვესტირებას ახდენენ კრიპტოპროექტებში.
დასკვნა
მაშასადამე, შეგვიძლია დავასკვნათ, რომ სისუსტე, პირველ რიგში, გამოავლინა სწორედ აშშ-ის საბანკო სისტემამ და Silvergate-ისა და Silicon Valley Bank-ის ხმაურიანი დახურვის შემდეგ, ყველა ბანკის აქციების ფასმა ვარდნა დაიწყო. შექმნილ ვითარებასთან დაკავშირებით აშშ-ის მთავრობამ 13 მარტს საგანგებო სხდომის მოწვევაც კი გადაწყვიტა.
ალბათ, ეს შეიძლება კავშირში იყოს Fed-ის მონეტარულ პოლიტიკასთან, რომელიც დაუღალავად ზრდის რეფინანსირების განაკვეთს, რის შედეგადაც იზრდება საპროცენტო განაკვეთები სესხებზე. კრიპტოვალუტის ბაზარზე ფასების დაწევაში ერთ-ერთი უმნიშვნელოვანესი როლი კი მარეგულირებლებმა შეასრულეს.
დმიტრო ლიტვინკო
ავტორი
