კრეიგ რაიტი: გიჟი თუ პროფესიონალი მოდავე?

კრეიგ რაიტის მიმართ სიძულვილი კრიპტოსაზოგადოებაში კარგ ტონად ითვლება. დაცინვის რაოდენობის მიხედვით, რაიტმა გადაუსწრო ბიტკოინ-ევანგელისტს როჯერ ვერს,ხოლო არაადეკვატური ქმედებების რაოდენობით, მან პირველი ადგილი დაიკავა, რომელიც ჯონ მაკ-აფის გარდაცვალების შემდეგ დაცარიელდა.

ეს დიდწილად დავების მიმართ გიჟური სიყვარულით არის განპირობებული, რომელშიც ის ბოლომდე ჩაეფლო,რათა მთელი მსოფლიოსთვის დაემტკიცებინა, რომ ის არის სატოში ნაკამოტო.

მაგრამ, ყველაზე გასაკვირი ის არის, რომ ეს დამოკიდებულება რაიტს არ აწუხებს. როგორც ჩანს, ის ხელმძღვანელობს პრინციპით „შავი პიარიც პიარია“.

წარმოგიდგენთ რამდენიმე უტყუარ ფაქტს თვითგამოცხადებული სატოშის ცხოვრებიდან:

კრეიგ რაიტი განთქმულია არა მხოლოდ დოქტორანტობით, არამედ თითქმის კოსმოსური მასშტაბის სიყვარულით დავების მიმართ .

რაიტის Modus operandi არის  მის წინააღმდეგ მიღებული ნებისმიერი სასამართლო გადაწყვეტილების გასაჩივრება. ნებისმიერ, თუნდაც ყველაზე უმნიშვნელო კონფლიქტს, ის ხანგრძლივ სასამართლო დავად აქცევს.

1. ყველაზე ძველი ცნობილი სასამართლო გადაწყვეტილება კრეიგის წინააღმდეგ 2004 წლის 31 აგვისტოთია დათარიღებული. მაშინ ის დამნაშავედ ცნეს კონკურენტულ გარემოში ბიზნესის წარმოების დარღვევაში და სასამართლოსადმი უპატივცემულობაში. მას მიესაჯა 28-დღიანი პირობითი პატიმრობა და 250-საათიანი საზოგადოებრივი სამუშაოები. კრეიგ რაიტმა გადაწყვეტილება გაასაჩივრა. ამისთვის  მას ერთი წელი და დაახლოებით 150 000 დოლარი დასჭირდა.

2. 2013 წლის ივლისში რაიტს პირველად წაუყენეს ბრალი ფიცის ქვეშ ყალბი ჩვენების მიცემაში. მაშინ განიხილებოდა საქმე „რაიტი კლეიმანის წინააღმდეგ“, სადაც ჩვენი გმირი ცდილობდა დეივ კლეიმანის 100%-იან კუთვნილებაში მყოფ W&K-ის აქციების 50%-ს დასაკუთრებოდა და მოეპოვებინა კონტროლი ბიტკოინებზე, რომელიც  უცნაურ ვითარებაში გარდაცვლილ დეივს ეკუთვნოდა. მაშინ მოსამართლემ დაავალდებულა რაიტი, რომ 100 მილიონი დოლარი გადაეხადა კლეიმანის ქვრივისთვის და 43 მილიონ დოლარზე მეტი  W&K-ისთვის. აღსანიშნავია, რომ სასამართლო პროცესი ჯერ კიდევ გრძელდება, რადგან რაიტი ასაჩივრებს უკვე მერამდენე განაჩენს. მოსამართლეებიც ვერ უძლებენ ამას და 2-3 სხდომის შემდეგ თვითაცილებას ითხოვენ, ხოლო რაიტს ჯერ განაჩენით დადგენილი თანხებიდან ერთი ცენტიც კი არ გადაუხდია.

3. 2017 წლიდან 2020 წლამდე კრეიგ რაიტი მოწმის სტატუსით მონაწილეობდა საქმეში, რომელსაც მისი მეუღლე Reliantco Investments Ltd-ს წინააღმდეგ აწარმოებდა. (დიახ, არ მოგესმათ. რაიტის მეუღლესაც უყვარს თავისუფალი დროის გატარება სასამართლო დარბაზში.) მოსამართლემ, რომელიც სხდომას თავმჯდომარეობდა, მოწმე ასე აღწერა:

4. 2019 წლის იანვრიდან 2022 წლის აგვისტომდე კრეიგს ბიტკოინ-ბლოგერ პიტერ მაკკორმაკთან ჰქონდა სასამართლო დავა. რაიტმა უჩივლა პიტერს იმის გამო, რომ მას ერთ-ერთ პოდკასტში თაღლითი უწოდა და დასცინა კრეიგის მცდელობებს თავი სატოში ნაკამოტოდ გაესაღებინა. მან მოითხოვა პიტერისგან 1,1 მილიონი დოლარი, როგორც მორალური ზიანის კომპენსაცია და ფინანსური ზარალის ანაზღაურება, რაც მას მიადგა, ვინაიდან მთელი მსოფლიოს წინაშე მატყუარად გამოცხადდა. მოსამართლე მარტინ ჩემბერლენმა გამოიტანა განაჩენი, რომ პროცესის დროს მაკკორმაკმა ვერ დაამტკიცა რაიტის თაღლითობა, ხოლო რაიტმა ვერ დაამტკიცა, რომ სწორედ ის იყო პირველი კრიპტოვალუტის შემქმნელი. შედეგად, სასამართლომ პიტერს მორალური ზარალის ასანაზღაურებლად £1 გადახდა დაავალდებულა, მაგრამ უარყო რაიტის მოთხოვნა, რომ მას მომავალში თაღლითი აღარ უწოდონ. ამასთანავე პიტერმა აღიარა, რომ 2-წლიანმა სასამართლო დავამ მასზე და მის ოჯახზე დიდი გავლენა მოახდინა. ეს იმდენად ნეგატიური გამოცდილება იყო, რომ ურჩევნია საერთოდ დაივიწყოს რაიტის არსებობის შესახებ.

5. ამჟამად გრძელდება Hodlonaut-თან სასამართლო დავა, რომელმაც ისევე, როგორც მაკკორმაკმა, საკუთარ თავს უფლება მისცა ეჭვი შეეტანა იმაში, რომ ჩვენი გმირი სატოში ნაკამოტოა. (ამ პროცესის დეტალები შეგიძლიათ იხილოთ ჩვენს ინტერვიუში Hodlonaut-თან).

6. იმისათვის, რომ ორჯერ არ შეწუხებულიყო, რაიტმა მაშინვე შეიტანა სარჩელი Binance-ისა და Coinbase-ის აღმასრულებელი დირექტორიების წინააღმდეგ, რომლებიც მხარს უჭერდნენ Hodlonaut-ს. (ამ სასამართლო სარჩელების  ბედი ჯერჯერობით უცნობია).

და ლოგიკურია ჩნდებოდეს კითხვა: არის თუ არა მისტერ კრეიგი კვერკულანტი* და ხომ არ საჭიროებს ფსიქიატრის დახმარებას?

ჩვენ შეგვიძლია დავეთანხმოთ ასეთ მოსაზრებას, რომ არა ერთი მცირე ფაქტი:  სასამართლოს ყველა  ხარჯს აფინანსებს რაიტის ახლო მეგობარი და პარტნიორი, მილიარდერი კალვინ ეირი. თვითგამოცხადებულ სატოშის რეგულარულად ასეთი დიდი თანხების გადახდის შესაძლებლობა არ გააჩნია. მისი პროექტის "ჭეშმარიტი ბიტკოინის" - BSV -ს წარმატება ძალზე საეჭვოა.

იქნებ ამ ტოქსიკური მანიპულაციების ნამდვილი მიზანი სატოშის საფულეზე კონტროლის მოპოვებაა?