როგორ შევამციროთ ბიტკოინის მაინინგის რისკები

BitInfoCharts-ის მონაცემების მიხედვით, 2023 წლის იანვრის მეორე ნახევარში, BTC-ის მაინერების მოგება 1 TH/s-ში ნიშნულამდე $0,07/დღეში დაეცა და 2020 წლის ოქტომბრის ფსკერი გაარღვია. ორი წლის წინანდელი ვარდნა ჩინეთის მხრიდან (იმ დროს  მსოფლიოში BTC-ის მოპოვების უმსხვილესი ცენტრი) კრიპტოვალუტების მაინინგის აკრძალვით ახსნეს. 

მზარდმა ზარალმა კრიპტომაინინგის ინდუსტრიაში ტექტონიკური ცვლილებები გამოიწვია. დარგობრივი კრიზისის მჭევრმეტყველი სიმპტომი საჯარო მაინერების მიერ დაგროვილი კრიპტოვალუტის რეზერვების მნიშვნელოვანი ნაწილის საზაფხულო გაყიდვა გახდა. გარდა ამისა, Bloomberg-ის შეფასებით, მაინინგ კომპანიებს პრობლემები სესხების მომსახურებაში შეექმნათ: კრედიტორებისთვის მთლიანმა რისკმა, შესაძლოა, $4 მილიარდი შეადგინოს.

საქმე ისაა, რომ უმრავლეს შემთხვევაში მაინერების კრედიტების უზრუნველყოფას BTC მოპოვებისთვის საჭირო აღჭურვილობა წარმოადგენს. მაინინგის კომპანიებმა, რომლებიც სესხების მომსახურებას ვეღარ უზრუნველყოფდნენ, ბანკებისთვის მაინინგ მანქანების მასობრივი დაბრუნება დაიწყეს. ათიათასობით უმოქმედო ASIC-მა აღჭურვილობის ბაზარზე დიდი ზეწოლა მოახდინა. შედეგად, წლის განმავლობაში მასზე ფასები, სხვადასხვა შეფასებით, 50-80%-ით დაეცა. 2022 წლის შემოდგომაზე მაინინგ კომპანიების პირველი მსხვილი გაკოტრებების შესახებ გახდა ცნობილი.

გასაკვირი არ არის, რომ მაინერები ბიზნესის რისკების შესამცირებლად და კრიპტოვალუტის მაინინგიდან მოგების მიღების გასაგრძელებლად სხვადასხვა გზებს ეძებენ. ამის ერთ-ერთი მაგალითია კომპანია Applied Digital, აშშ-ის ქალაქ დალასიდან, რომელიც კრიპტოვალუტით ფულის გამომუშავების საშუალებებს უკვე რამდენიმე წელია ეძებს. თითქმის ორი ათეული წელი კომპანიის სპეციალიზაცია HR სერვისები იყო. 2020 წელს Applied Digital-ის მფლობელმა თავის ბიზნესს პროფილი შეუცვალა, მაინერი გახდა და წარმოების შესაძლებლობების აქტიური გაფართოება დაიწყო. მაგრამ უკვე 2021 წელს ბიზნესმენმა გადაწყვიტა, ბიტკოინის რეკორდებით სარგებელი სხვაგვარად მიიღოს. ახალი პროექტის ფარგლებში, Applied Blockchain-მა third-party მაინერებს შესთავაზა, მონაცემთა დამუშავების ცენტრებში სივრცეები ექირავებინათ. შეგახსენებთ, რომ იმავე წლის შუა პერიოდში ჩინეთმა მაინინგის წინააღმდეგ მკაცრი ზომები მიიღო. მაინერებს ქვეყნიდან გაქცევა მოუწიათ, აშშ-ში სიმძლავრეებზე მოთხოვნა კი მკვეთრად გაიზარდა. 

იმისათვის, რომ ბიზნესი უფრო პროგნოზირებადი გახადოს, Applied Blockchain გრძელვადიან კონტრაქტებს აფორმებს და  გაქირავების ტარიფს აფიქსირებს. პროექტის პირველი ეტაპი პლატფორმაა, რომლის საერთო სიმძლავრე 100 მეგავატს შეადგენს. იგი რამდენიმე თვეში, 2021 წლის ბოლოს აშენდა. 2022 წლის აპრილში კომპანია IPO-ზე გავიდა.

მართალია, უკვე ნოემბერში მან სახელი შეიცვალა და Applied Digital გახდა, "რათა აესახა მისი შესაძლებლობა, მოემსახუროს მომხმარებელთა უფრო ფართო სპექტრს". ახლა მათ შორის არიან ფინანსური კომპანიები, რომლებიც მაინერებს აღჭურვილობის შესაძენად კრედიტებს აძლევდნენ. როდესაც ზოგიერთმა მსესხებელმა სესხების მომსახურება ვერ შეძლო, მათ აღჭურვილობა ჩამოართვეს და Applied Digital-ის სივრცეში განათავსეს.

გარდა ამისა, Applied Digital-მა შექმნა ფონდი, რომელიც დაგირავებულ სერვერებს ყიდულობს და მათ ექსპლუატაციას ეწევა.

მიუხედავად ბაზარზე მომხდარი ყველა რყევისა, უახლოეს რამდენიმე თვეში კომპანია ექსპლუატაციაში ჩაუშვებს კიდევ 2 ობიექტს, რომელთა საერთო სიმძლავრე 380 მგვტ-ს შეადგენს. ერთ-ერთი მათგანისთვის ენერგიის წყარო ქარის ელექტროსადგური იქნება.

როგორც Reuters-ს კრიპტოსაინვესტიციო პლატფორმა Bitcoin IRA-ს თანადამფუძნებელმა, კრის კლაინმა (Chris Kline) განუცხადა, დღეს მაინინგი ვალდებულია, „ჰიპერფოკუსირება“ ენერგოეფექტურობაზე მოახდინოს.