რა თქვა ჯერომ პაუელმა Fed-ის სხდომაზე

პაუელმა საბანკო სექტორს ჯანსაღი და მდგრადი უწოდა და აღნიშნა, რომ მარტის დასაწყისიდან სიტუაცია გაუმჯობესდა. მან ასევე აღიარა მუდმივი მონიტორინგის აუცილებლობა და Silicon Valley Bank-ის მენეჯმენტში გამოვლენილი ხარვეზები მოიყვანა. ზედამხედველობის გამკაცრებისა და უფრო მკაცრი წესების შექმნის მიზეზი სწორედ ეს გახდა.

საინტერესოა, რომ ამ გამოსვლიდან მალევე, სწრაფად დაეცა (50%-ზე მეტით) კიდევ ერთი ამერიკული ბანკის, PacWest Bancorp-ის აქციები. ამიტომ, ფედერალური სარეზერვო სისტემის თავმჯდომარის სიტყვები, ცხადია, კრიტიკულად უნდა იყოს აღქმული.

ჯერომ პაუელმა ხაზგასმით აღნიშნა, რომ საბანკო სექტორი ინფლაციის წინააღმდეგ მიმდინარე ბრძოლაზე მნიშვნელოვან გავლენას არ ახდენს და Fed ისევ კონცენტრირებულია თავისი მიზნის მიღწევაზე, რომელიც სამომხმარებლო ფასების 2%-იან ინდექსს უკავშირდება. მან განმარტა, რომ რეფინანსირების განაკვეთი არ შემცირდება, სანამ ბაზრის პროგნოზი არ შეიცვლება.

შეხვედრისას, ფედერალური სარეზერვო სისტემის ხელმძღვანელმა აღიარა, რომ ჯერ კიდევ ნარჩუნდება მსუბუქი რეცესიის შესაძლებლობა, რომელიც წინასთან შედარებით, უმუშევრობის უფრო მცირე ზრდით ხასიათდება. მიუხედავად მისი განცხადებისა იმის შესახებ, რომ რეცესიის თავიდან აცილება, დიდი ალბათობით, შესაძლებელია, ის უარყოფით სცენარს მაინც არ გამორიცხავს.

პაუელი სახელმწიფო ვალის ზედა ზღვრის საკითხსაც შეეხო და მისი დროული ზრდის მნიშვნელობა აღნიშნა. წინააღმდეგ შემთხვევაში, ამან შეიძლება გამოიწვიოს უარყოფითი შედეგები აშშ-ის ეკონომიკისთვის (მაგალითად, დეფოლტი).