Ark Invest-ის წარმოუდგენელი პროგნოზები 2023-2030 წლებისთვის

ერთ-ერთი მთავარი ტენდენცია, რომელიც ანგარიშშია ასახული,   არის ხელოვნური ინტელექტი (AI). ბოლო დროს ის დიდ ყურადღებას იპყრობს, განსაკუთრებით, თუ გავიხსენებთ ChatGPT-სა და სხვა დიდ მოთამაშეებს, როგორიცაა Google და Baidu, რომლებიც ასევე შეუერთდნენ რბოლას. ამჟამად, ხელოვნური ინტელექტის სწავლების ღირებულება სწრაფად ეცემა. ამგვარად, Ark Invest პროგნოზირებს, რომ 2030 წლისთვის ის მკვეთრად შემცირდება $450,000-დან $30-მდე. ანგარიშში ასევე ნათქვამია, რომ ათწლეულის ბოლოსთვის ხელოვნური ინტელექტი ცოდნის სფეროს მუშაკების პროდუქტიულობას გააოთხმაგებს, რაც ხაზს უსვამს ამ ახალ რეალობასთან ადაპტაციის მნიშვნელობას.

კიდევ ერთი მოახლოებული ცვლილება არის კრიპტოვალუტური ბაზრის ზრდა. Ark Invest-ის შეფასებით, 2030 წლისთვის ის შეიძლება გაიზარდოს $1 ტრილიონიდან $25 ტრილიონამდე, თანაც დეცენტრალიზებული ფინანსები (DeFi) ამ ბაზრის დაახლოებით მეხუთედს დაიკავებს. DeFi-ს აქვს პოტენციალი, მიაწოდოს ფინანსური მომსახურება 2 მილიარდზე მეტ ადამიანს მსოფლიოში, რომლებსაც საბანკო სერვისებზე წვდომა არ აქვთ. 

 

გარდა ამისა, ბონდები, აქციები და სხვა ფინანსური აქტივები თანდათან შემოვა კრიპტოვალუტურ სივრცეში. ტრადიციულ ფინანსურ სექტორს შეუძლია, ისარგებლოს საჯარო ბლოკჩეინებით, რომლებიც გამჭვირვალე და ხელმისაწვდომია მსოფლიოს ნებისმიერი წერტილიდან, ამასთან, უზრუნველყოფს თავისუფლებას ფინანსური შუამავლებისგან. დიახ, საუბარია ტოკენიზებულ აქტივებზე და თუ ისინი დაიკავებს გლობალური ფინანსური ბაზრის მხოლოდ 5%-ს, მაშინ 2030 წლისთვის წლიური მოსაკრებლის სახით 450 მილიარდი დოლარი დაგენერირდება. 

დათვური საბაზრო ტენდენციების ფონზეც კი, Ark Invest ბიტკოინის მიმართ "ხარულად" არის განწყობილი. კომპანია ადასტურებს ფასის პროგნოზს, რომლის მიხედვით 2030 წლამდე ერთი მონეტის ფასი 1 000 000 დოლარი იქნება. BTC-ის ზრდას, სავარაუდოდ, ხელს შეუწყობს მისი გლობალური აღიარება და როლი ფინანსურ და ინტერნეტ რევოლუციებში, რომლებიც გრძელდება.

 

მოსალოდნელია, რომ გლობალური საკრედიტო კრიზისი გაღრმავდება, ხოლო ბიტკოინი შეიძლება გახდეს უსაფრთხო თავშესაფარი ღირებულების შესანარჩუნებლად. იმისთვის, რომ ფასმა 1 მილიონ დოლარს  მიაღწიოს, ბიტკოინს დასჭირდება ტრადიციული ფინანსური ბაზრების მხოლოდ შედარებით მცირე წილის დაუფლება.

და ბოლოს, ანგარიშში ხაზგასმულია ციფრული საფულეების მზარდი მნიშვნელობა. სმარტფონის მქონე 6,6 მილიარდი მომხმარებლით მსოფლიოში, ციფრული საფულეების პლატფორმები, რომლებიც კრიპტოვალუტებს უჭერს მხარს, ტრადიციულ ბანკებზე უფრო სწრაფად მასშტაბირდება. Ark Invest-ის პროგნოზით, ციფრული საფულეების მომხმარებელთა რიცხვი მსოფლიოში ყოველწლიურად დაახლოებით 8%-ით გაიზრდება, ხოლო 2030 წლისთვის ამ სერვისებით მსოფლიოს მოსახლეობის 65%-მდე ისარგებლებს. ფიზიკური ბანკების აუცილებლობის აღმოფხვრით, ციფრული საფულეების მეშვეობით განხორციელებული ტრანზაქციები კლიენტებსა და გამყიდველებს ჯამში $50 მილიარდის დაზოგვის საშუალებას მისცემს, რაც ფინანსების გამოყენების კუთხით მნიშვნელოვან ცვლილებებს მოასწავებს.

ელექტრომობილები უფრო ხელმისაწვდომი და იაფი ხდება. Ark Invest-ის პროგნოზით, ელექტრომობილების გაყიდვები 2027 წლისთვის შვიდჯერ გაიზრდება, 2022 წელს დაფიქსირებული 7,8 მილიონიდან  60 მილიონ ერთეულამდე. მოსალოდნელია დამუხტვის დროის შემცირებაც. ეს ელექტრომობილების შემდგომ გავრცელებას შეუწყობს ხელს.

რობოტიკა და 3D ბეჭდვა წარმოებაში რევოლუციას ახდენს და ამის ნათელი მაგალითი კომპანია Amazon-ის მიერ რობოტების უფრო ფართო გამოყენებაა. მოსალოდნელია, რომ მომდევნო რვა წლის განმავლობაში ეს ტექნოლოგიები ეკონომიკურ წარმოებას წელიწადში დაახლოებით 80%-ით გაზრდის, ხოლო დარგის ღირებულება გაიზრდება 70 მილიარდი დოლარიდან 2022 წელს 9 ტრილიონ დოლარამდე 2030 წლისთვის.