ბანკები კრიპტობირჟებთან მუშაობას წყვეტენ: რა იქნება შემდეგ

საგანგაშო სიგნალი იყო ბოლოდროინდელი პაუზა ბირჟა Binance-ზე USD-ის შეტანასა და გატანასთან დაკავშირებით. მისმა გენერალურმა დირექტორმა, ჩანპენ "CZ" ჩჟაომ ხაზი გაუსვა, რომ ეს არ არის ერთეული შემთხვევა. „ზოგიერთი ბანკი კრიპტოვალუტების მხარდაჭერას წყვეტს“, - დაწერა მან ტვიტერზე. მანამდე, ამერიკულმა Signature Bank-მა უარი თქვა Binance-ის მომხმარებლების იმ ტრანზაქციების დამუშავებაზე, რომელთა თანხა $100 ათასზე ნაკლებს შეადგენს. 

კრიპტოპროექტების უმეტესობისთვის პარტნიორი ბანკების პოვნა ადვილი არასოდეს ყოფილა. როდესაც მთავრობები ლამის ყოველდღიურად აფრთხილებენ კრიპტობირჟებთან თანამშრომლობის რისკების შესახებ, კრიპტოსადმი ლოიალური ბანკირების პოვნა სულ უფრო რთული ხდება. აშშ-ში კრიპტოსექტორის მსხვილი პარტნიორები იყვნენ Metropolitan Bank, Silvergate Capital და ბანკი Signature. დღეს ისინი მნიშვნელოვნად ამცირებენ კრიპტოვალუტურ პროექტებს, ან საერთოდ ტოვებენ დარგს. 

მაგალითად, რა დაემართა Silvergate-ს? ამ ბანკმა კრიპტოკომპანიებისთვის სპეციალური სადეპოზიტო პროგრამები შეიმუშავა. FTX-ის კრახის შემდეგ, კრიპტობიზნესი Silvergate-ს თავისი დანაზოგის გასატანად ეცა. შედეგად, ბანკის დეპოზიტები $8,1 მილიარდით, ანუ 70%-ით დაიწია. ეს ნებისმიერი საბანკო დაწესებულებისთვის კატასტროფაა. 

არც ევროპაშია უკეთესი სიტუაცია. მაგალითად, დიდი ბრიტანეთის ბანკები Binance-თან და Coinbase-თან მუშაობაზეც კი უარს ამბობენ. უნდა გვესმოდეს, რომ საქმე მხოლოდ კრიპტოაქტივების მიმართ სკეპტიციზმში არაა. ტრადიციული ფინანსური სისტემა მკაცრად რეგულირდება. მარეგულირებლების ამოცანა კლიენტის დაზარალების, ანუ მის მიერ თანხის დაკარგვის ალბათობის მინიმუმამდე დაყვანაა. მომხმარებლისთვის ზიანის მიყენების შემთხვევაში, ბანკები, შესაძლოა, არაკეთილსინდისიერ საბაზრო ქმედებებში დაადანაშაულონ და მილიონებით დააჯარიმონ.
 გავიხსენოთ სკანდალური სასამართლო პროცესები, რომლებიც ბოლო თვეების კრიპტოგაკოტრებებს ახლავს თან. კონსერვატიული საბანკო სექტორისთვის მიმდინარე მოვლენებზე ერთი შეხედვაც საკმარისია იმის გასაგებად, რომ არსებული რისკები შესაძლო სარგებელს აშკარად აჭარბებს. 

ვითარება, როდესაც კრიპტოვალუტის პლატფორმები დოლარის გადარიცხვებზე წვდომისგან მთლიანად მოწყვეტილები იქნებიან, უახლოეს მომავალში ნაკლებად სავარაუდოა. თუმცა, კრიპტოინდუსტრიის დაძაბულობა ტრადიციულ ფინანსურ ინსტიტუტებთან თანამშრომლობის გამო, ცხადია, გაგრძელდება. პირველ რიგში, ამის მიზეზი მარეგულირებლების პოზიციაა. იქმნება შთაბეჭდილება, რომ ისინი დარგის დასახრჩობად ყველაფერზე წამსვლელები არიან. 

მეორეს მხრივ, კრიპტობაზრის მოთამაშეებისთვის ზურგის შექცევასთან ერთად, ტრადიციული საბანკო ინსტიტუტები საკუთარი კრიპტოპროექტების განვითარების წინააღმდეგნი საერთოდ არ არიან. ასევე არის მესამე დაინტერესებული მხარე - მთავრობები, რომლებიც აშკარად დებენ ფსონს ცენტრალური ბანკების ციფრული ვალუტების დანერგვაზე. ვინ გამოვა ამ ბრძოლაში გამარჯვებული, ამას უახლოეს წლებში ვნახავთ.